அச்சிறுபாக்கம், ஒரத்தி காவல் எல்லைக்குட்பட்ட பகுதிகளில் செயல்படுத்தப்பட்ட "கிராம காவல் கண்காணிப்பு குழு" | Village Level Police Vigilance Officer Team | Vil Ambu News

செங்கல்பட்டு மாவட்டம் ,மதுராந்தகம் உட்கோட்டம் அச்சிறுப்பாக்கம் காவல் நிலைய எல்லைக்குட்பட்ட பெரும்பேர்கண்டிகை கிராமத்தில் கிராம காவல் கண்காணிப்பு குழு (Village Level Police Vigilance Officer Team) தொடக்க விழா கடந்த 07.01.2021 அன்று நடைபெற்றது. 

பொதுமக்களுக்கும் காவல்துறைக்கும் இடையேயுள்ள நல்லுறவை மேம்படுத்தும் முயற்சியாக கிராம காவல் கண்காணிப்புக் குழு உருவாக்குவதற்கான வழிகாட்டுதல் மற்றும் நெறிமுறைகளை தமிழக காவல்துறை சுற்றறிக்கை மூலமாக அனைத்து காவல்நிலையத்திற்கும் கடந்த வாரம் அனுப்பியது. 

அதன்படி கடந்த 07.01.2021 அன்று அச்சிறுபாக்கம் காவல் நிலைய எல்லைக்குட்பட்ட பெரும்பேர்கண்டிகை கிராமத்தில் தமிழக காவல்துறையின் சிறப்பு தலைமை இயக்குனர் ராஜேஷ் தாஸ் ஐபிஎஸ் இந்நிகழ்ச்சியை துவக்கி வைத்தார்.  

இந்த நிகழ்ச்சியில் காஞ்சிபுரம் சரக காவல்துறை துணைத் தலைவர் சாமுண்டீஸ்வரி ஐபிஎஸ், செங்கல்பட்டு மாவட்ட காவல் கண்காணிப்பாளர் கண்ணன், மதுராந்தகம் உட்கோட்ட துணைக் காவல் கண்காணிப்பாளர் கவினா ஆகியோர் கலந்து கொண்டனர். 

இந்நிகழ்ச்சியில் கலந்துகொண்ட தமிழக காவல்துறையின் சிறப்பு தலைமை இயக்குனர்,  கிராம காவல் கண்காணிப்பு குழு மூலமாக கிராம பகுதிகளில் நிகழும் சட்டத்திற்குப் புறம்பான செயல்களை உடனடியாக களைவதற்கு இந்த குழுவின் செயல்பாடுகள் உதவும் எனவும், சிறுசிறு சச்சரவுகள்,குடும்ப பிரச்சனைகள் போன்றவற்றிற்கு நேரடியான புகார் நடைமுறைகள் ஏதும் இல்லாமல் உடனடியாக காவல்துறையினரை அணுகி உரிய தீர்வை பெற்றுக் கொள்வதற்கும், பொதுமக்களுக்கு சட்டங்கள் பற்றிய விழிப்புணர்வு அளிப்பதற்காகவும் மேலும் இந்த செயல்பாட்டின் மூலமாக பொதுமக்களுடனான நல்லுறவை காவல்துறை மேலும் மேம்படுத்திக் கொள்ளும் என்ற உறுதியையும் அளித்து, இதன் நோக்கம் பற்றி விரிவாக எடுத்துரைத்து சிறப்புரையாற்றினார். 

மேலும், ஒவ்வொரு கிராமத்திற்கும் நியமனம் செய்யப்பட்டுள்ள காவலர்களை கிராம மக்களுக்கு  அறிமுகம் செய்துவைத்தார். இறுதியாக அச்சிறுப்பாக்கம் காவல் நிலைய ஆய்வாளர் சரவணன் நன்றியுரை வழங்கினார்.

பின்னர், அச்சிறுபாக்கம் மற்றும் ஒரத்தி காவல் நிலைய எல்லைக்குட்பட்ட 86 கிராமங்களிலும் சிறப்பு நிகழ்ச்சிகள் ஏற்பாடு செய்யப்பட்டு தங்களது பகுதிக்கு நியமனம் செய்யப்பட்ட காவலர்களை அறிமுகம் செய்து  கிராம காவல் கண்காணிப்பு குழுவின் முக்கியத்துவம் குறித்து விழிப்புணர்வு அளிக்கப்பட்டது. 

ஒவ்வொரு கிராமத்திற்கும் நியமிக்கப்பட்ட காவலரின் கைப்பேசி எண் மற்றும் அவரது புகைப்படம் அடங்கிய பதாகைகள் மூலமாக காவலர்களை அறிமுகம் செய்தனர். மேலும், கிராம முக்கியஸ்தர்கள் அடங்கிய வாட்ஸ்-ஆப் குழு மூலமாகவும் இந்த திட்டம் தொடர உள்ளதாக எடுத்துரைக்கப்பட்டது. காவல் துறையின் இந்த திட்டமானது பெரிதும் உதவும் எனவும், மக்களுடன் ஒற்றுமை ஏற்பட இது ஒரு சிறந்த வழி எனவும் பொதுமக்கள் தெரிவித்தனர்.

சோத்துப்பாக்கத்தில் சிறப்பாக நடைபெற்ற ஹெல்மெட் விழிப்புணர்வு பேரணி செண்டிவாக்கம் ஆர்.சி. பள்ளி மாணவர்களின் பிரம்மாண்ட அணிவகுப்பு | Sendivakkam School Conducted Helmet Awareness

செங்கல்பட்டு மாவட்டம், செய்யூர் வட்டம், சோத்துப்பாக்கத்தில் இன்று காலை 10 மணியளவில் அல்ப்ரிடோ கூமோ குழுமம் மற்றும் செண்டிவாக்கம் ஆர்.சி மேல்நிலைப்பள்ளி மாணவர்களின் சார்பாக பிரம்மாண்ட ஹெல்மெட் விழிப்புணர்வு பேரணி நடைபெற்றது.

சோத்துப்பாக்கம் லூர்து நகர் தேவாலயத்தில் துவங்கிய இந்த பேரணியினை அச்சிறுபாக்கம் காவல் ஆய்வாளர் சரவணன் மற்றும் மேல்மருவத்தூர் காவல் துணை ஆய்வாளர் தேவதாஸ் ஆகியோர் கொடியசைத்து துவக்கி வைத்தனர்.
 

வந்தவாசி சாலை, சோத்துப்பாக்கம் பஜார் பகுதி என அனைத்து பகுதிகளிலும் பள்ளி மாணவர்கள் விழிப்புணர்வு பதாகைகளை கையில் ஏந்தியபடி முழக்கமிட்டு ஹெல்மெட் அணிவதன் கட்டாயத்த்தை பொதுமக்களிடையே ஏற்படுத்தினர்.

பேரணி துவங்குவதற்கு முன்னர் நடத்திய நிகழ்ச்சியில் செங்கல்பட்டு மறைமாவட்ட ஆர்.சி. பள்ளிகளின் கண்காணிப்பாளர் ரோச் இனேஷியஸ், கூமோ திட்ட மேலாளர் சார்லஸ் குழந்தை, பள்ளியின் தாளாளர் ஆராக்கிய ரேமண்ட் ஆகியோருடன் அச்சிறுபாக்கம் காவல் ஆய்வாளர் சரவணன் மற்றும் மேல்மருவத்தூர் காவல் துணை ஆய்வாளர் தேவதாஸ் ஆகியோர் குத்துவிளக்கு ஏற்றி விழாவினை துவங்கினர். இந்த பேரணியில் பள்ளி தலையாசிரியை மற்றும் சக ஆசிரியர்கள் உடனிருந்தனர்.

பள்ளி மாணவர்களின் இந்த தலைக்கவசம் அணிவதின் முக்கியத்துவத்தை உணர்த்தும் பேரணியை அனைத்து பொதுமக்களும் வரவேற்றனர்.    

பொண்டாட்டிக்கு 4 பேரோட தொடர்பு.. சந்தேகப்பட்ட கணவர்.. "கம்" போட்டு ஒட்டி.. ஷாக்கடிக்கும் சம்பவம்! Wife Husband Crime News

இப்படி ஒரு கொடுமை எந்த ஊரிலும் நடந்திருக்குமான்னு தெரியலை. மனைவிக்கு ஆண்களுடன் தொடர்பு இருந்ததாக சந்தேகப்பட்ட கணவர், ஒரு சூப்பர் க்ளூ கம்மை வாங்கி மனைவியின் பிறப்புறுப்பில் ஒட்டி விட்டார். இதனால் வலியில் துடித்து அலறிய அப்பெண்ணுக்கு மருத்துவமனையில் சிகிச்சை கொடுத்துள்ளனர். 

 

அந்த கிறுக்குப் பிடிச்ச கணவரின் பெயர் டென்னிஸ் முமோ. 36 வயதாகிறது. இவருக்கு எப்பப் பார்த்தாலும் தன்னோட மனைவி மீது சந்தேகம் இருந்து கொண்டே இருந்தது. அவருக்கு பல ஆண்களுடன் தொடர்பு இருக்கலாம் என சந்தேகப்பட்டார். குறிப்பாக நான்கு ஆண்களுடன் உறவு இருப்பதாக அவரே நினைத்துக் கொண்டார்.

இதனால் கோபமடைந்த அவர் என்ன செய்யலாம் என்று யோசித்தார். இந்த நிலையில்தான் ருவாண்டா நாட்டுக்கு ஒரு வேலையாக செல்ல வேண்டியிருந்தது. தான் போய் விட்டால் மனைவி என்னவெல்லாம் செய்வாளோ என்று பயந்த அவரது குறுக்குப் புத்தி வேறு விதமாக யோசித்தது. விலை உயர்ந்த சூப்பர் க்ளூ கம்மை வாங்கினார். 

பின்னர் தனது மனைவியை கட்டாயப்படுத்தி கம்மை அவரது பிறப்புறுப்பில் தடவி ஒட்டி விட்டார். பின்னர் ருவாண்டா கிளம்பிப் போய் விட்டார். கம் ஒட்டப்பட்டதால் பெரும் அவதிக்குள்ளானார் முமோ மனைவி. சிறு நீர் கழிக்கக் கூட முடியாமல் சிக்கலில் மாட்டிக் கொண்டார். வலியில் அலறித் துடித்த அவர் உடனடியாக போலீஸாருக்குத் தகவல் கொடுத்தார். போலீஸார் விரைந்து வந்து அவரை மருத்துவமனையில் சேர்த்தனர். 

டாக்டர்கள் அவருக்கு அவசரமாக சிகிச்சை அளித்து கம்மை அகற்றி நிவாரணம் அளித்தனர். அந்தப் பெண் கொடுத்த புகாரின் பேரில் போலீஸார் வழக்குப் பதிவு செய்து முட்டாள் முமோவைக் கைது செய்தனர். தற்போது முமோ வேறு மார்க்கமாக தனது மனைவியை பழி வாங்கக் கிளம்பியுள்ளாராம். 

அதாவது அந்த நாட்டுச் சட்டப்படி கணவருக்கு தெரியாமல் மனைவியோ அல்லது மனைவிக்குத் தெரியாமல் கணவரோ தகாத உறவு வைத்திருந்தால் 100 சவுக்கடி தண்டனையாக தரப்படும். அந்த தண்டனையை தனது மனைவிக்குத் தர வேண்டும் என்று இப்போது அடம் பிடித்துக் கொண்டிருக்கிறார் முமோ. இதுதொடர்பாக அவர் போலீஸிலும் புகார் கொடுத்துள்ளாராம். 

இதுதொடர்பாக முமோ கூறுகையில், அவளது செல்போன் மெசேஜ் எல்லாம் ஆண்களுக்கே போயுள்ளது. பல ஆண்களுக்கு தனது நிர்வாணப் படத்தையும் அனுப்பியுள்ளார். எனவே அவர் என்னை ஏமாற்றி விட்டார். துரோகம் செய்து விட்டார். அதனால்தான் நான் கம் ஒட்டினேன். நான் ருவாண்டோ செல்லவிருந்த சமயத்தில் சில ஆண்களை சந்தித்து ஜாலியாக இருக்க திட்டமிட்டிருந்தார். 

இதனால்தான் வேறு வழி தெரியாமல் கம்மை ஒட்டினேன் என்று கூறியுள்ளார் முமோ. அதுக்காக இப்படியாப்பா பண்ணுவ.. என்னவோ போங்கடா!!

உத்திரமேரூர் மருத்துவமனையில் நர்ஸ்களுக்கு உடைமாற்ற அறை வேண்டும் | Nurses Want Dress Change News in Uthiramerur Hospital

காஞ்சிபுரம் மாவட்டம், உத்திரமேரூர் அரசு மருத்துவமனையில் பணிக்கு வரும்போதும், பணி முடிந்து செல்லும்போதும் உடை மாற்ற தனி அறை இல்லாமல் பெரும் சிரமத்துக்குள்ளாவதாக செவிலியர்கள் வேதனைபடுகின்றனர்.

உத்திரமேரூர் பஜார் வீதியில் உள்ள அரசு மருத்துவமனை, 50க்கும் மேற்பட்ட படுக்கை வசதியுடன் இயங்கி வருகிறது. இங்கு, எட்டு செவிலியர்கள் பணிபுரிந்து வருகின்றனர். தினமும், 500 முதல் 700 நோயாளிகள் வந்து செல்கின்றனர். 

இந்த மருத்துவமனையில்  உள் நோயாளிகள், புற நோயாளிகள் மற்றும் மருத்துவர்களுக்கு என  தனித்தனி கழிப்பறை வசதி உள்ளது. ஆனால், செவிலியர் மற்றும் ஊழியர்களுக்கு என  தனி கழிப்பறை வசதி இல்லை. மேலும், செவிலியர்கள் உடை மாற்றும் அறையும் இல்லை.

இதனால், பிரசவ வார்டில் செவிலியர்கள் உடைமாற்றி வருவதாகவும், அப்போது, அங்கு அனுமதிக்கப்பட்டுள்ள தாய்மார்களையும், பிறந்த குழந்தையையும் பார்க்க  ஆண்கள் யாராவது உள்ளே வந்துவிடுவார்களோ என்ற அச்சத்துடனே அவர்கள் உடையை மாற்றுவதாகவும் வேதனை தெரிவிக்கின்றனர்.  

எனவே, செவிலியர்கள் உடை மாற்றவும், ஊழியர்களுக்கும் என  தனி கழிப்பறையும் அமைக்க வேண்டும் என கோரிக்கை எழுந்து உள்ளது.

மதுராந்தகத்தை அடுத்த பெரும்பாக்கத்தில் பருவமழை பொய்த்ததால் விவசாயிகள் வேதனை | Perumbakkam Near Madurantakam

செங்கல்பட்டு மாவட்டம், மதுராந்தகம் வட்டம், பெரும்பாக்கம் கிராமத்தில் 2000-க்கும் மேற்பட்டோர் வாழ்ந்துவருகின்றனர். இதில் 80% மக்களுக்கு விவசாயமே பிரதான வாழ்வாதாரமாக விளங்குகிறது. 

இந்நிலையில் இந்த ஆண்டு பொழிய வேண்டிய பருவ மழையின் அளவு மிகவும் குறைவானதால், ஏரிநீர் பாசனத்தை நம்பி இருந்த சுமார் 1000 ஏக்கர் விவசாய நிலம் வெறும் நிலமாக உள்ளது. மழையை நம்பி ஏர் உழுது காத்திருந்த விவசாயிகளுக்கு ஏமாற்றமே மிஞ்சியது. 

200 ஏக்கர் பரப்பளவு கொண்ட ஏரியில் நீர் இல்லாததால் ஏரி பாசனத்தை நம்பிய விவசாயிகள் நிலைகுலைந்துள்ளனர். எனவே, இந்த ஆண்டு பொங்கல் விழாவினை கொண்டாடும் சூழலே எங்களுக்கு இல்லை என மிகவும் வேதனையுடன் தெரிவிக்கின்றனர் பெரும்பாக்கம் கிராம விவசாயிகள். 

எனவே, தமிழக அரசின் வருவாய்த்துறை, பொதுப்பணித்துறை அதிகாரிகள் எங்கள் கோரிக்கைகளுக்கு செவிசாய்த்து, தக்க நிவாரணம் வழங்க வேண்டுமென குமுறுகின்றனர் பெரும்பாக்கம் கிராம விவசாயிகள்.